ВМРО-ДПМНЕ: Власта спротивно на Уставот апси граѓани на бадникарски оган, а мижи за своите

„Зоран Заев и Оливер Спасовски вчера удрија по граѓаните покажувајќи сила на обичен народ. Синоќа спротивно на Уставот беа уапсени граѓани во селото Орман кои присуствувале на традиционален бадникарски оган, а во исто време лицемерите од власта мижат пред кршењата на законите и протоколите кои ги прават владините функционери и блиските до власта“, реагираат од ВМРО-ДПМНЕ, откако вчера МВР соопшти дека, врз основа на забраната за организација и одржување на прослави на јавни места и површини по повод престојните празници, привела десетина лица кои ги затекнала покрај оган во селото Орман.

„Замислете беа брутално и насилно апсени граѓани од селото Орман на бадникарски оган, а кога функционерите на СДСМ славеа во Штип пред неколку дена, со оркестри, со софри, без дистанци и без маски немаше никаква реакција на институциите“, обвинуваат од ВМРО-ДПМНЕ.

„Каде беа институциите да реагираат и на прославата на роденден на функционерите од владеачката ДУИ во државна институција спротивно на сите протоколи и норми на пристојно однесување? Зошто нема никаква санкција за Венко Филипче и Зоран Заев кои исто така без маски и без дистанца се фотографираа со своите деца на квадрициклите првиот ден од Новата година?“, прашува опозицијата.

Според нив, целта е јасна:

„Владата на Заев ги заплашува обичните граѓани и бесрамно покажува дека едно важи за обичниот човек, а сосема други правила важат за власта.

Прочитајте и:  Петрушевски: МЕПСО под СДС и ДУИ склучило договор со албанска фирма за набавка на уред за 3 милиони евра поскапо од тоа што предвиделе

Ако Спасовски сака да тренира строгост и владеење на правото тогаш зошто сѐ уште не откри кај завршија парите од полната торба рекет, зошто нема никаква разрешница на случајот со Ден Дончев за скандалот во кој целата јавност го виде како става снопчиња пари во својата чанта, зошто нема правна разрешница за милионскиот скандал ‘Леонардо’ во кој беше директно вмешан поранешниот владин генерален секретар Драги Рашковски, зошто нема разрешница на криминалните иновации, зошто нема разрешница за прислушкувањето во Јавното обвинителство, матните зделки со инсулинот, матните зделки на СВ Инвест во РЕК Битола, зошто нема санкција за градоначалникот на Шуто Оризари кој тепаше граѓанин и стотици други криминали, скандали и афери на власта на Заев? Одговорот е очигледен. Оваа власт за функционерите е мајка, а за народот е маќеа“, порача на партиска прес-конференција пратеникот на ВМРО-ДПМНЕ – Бојан Стојаноски.

Тој додаде и дека ВМРО-ДПМНЕ ќе им обезбеди бесплатна правна помош на граѓаните кои вчера противуставно и насилно беа приведени, но и на сите останати во вакви слични случаи во кои, како што рече, власта на Заев противуставно ги крши слободите и правата на обичниот граѓанин.

„Оваа насилна власт на Заев колку повеќе станува нервозна, толку повеќе ќе удира по народот, ама ВМРО-ДПМНЕ и граѓаните цврсто ќе им се спротивстават и на крајот ќе ги победат“, рече Стојаноски.

- Реклама -