Српскиот тенисер Новак Ѓоковиќ имаше импресивно враќање на тенисот откако го повреди десното колено на Ролан Гарос Во првото коло на Вимблдон го победи чешкиот играч Вито Коприва со 6-1, 6-2, 6-2.
Неполни два часа беа доволни за вториот носител и седумкратен освојувач на Вимблдон да слави против 123. тенисер во светот и играчот кој квалификациите ги мина на лондонската трева.
Во секој поглед 37-годишниот Ѓоковиќ доминираше во текот на натпреварот, особено на почетниот удар. Во првиот сет загуби само еден сервис поен, а во вториот три. Коприва пружи нешто посилен отпор во третиот сет, но и тоа беше премалку за да му се закани на Ѓоковиќ и да освои повеќе од два гема. Во второто коло Ѓоковиќ ќе игра против победникот од мечот во кој се среќаваат Шпанецот Моро Канас и Британецот Фирнли.
Многу едноставен старт на Вимблдон имаше и четвртиот носител, Германецот Александер Зверев, кој го совлада Шпанецот Роберто Карбалес Баена со 6:2, 6:4, 6:2, додека три тај-брејка беа забележани во австралискиот дуел меѓу Алекс Де Минор и Џејмс Дакворт. Де Минор ги доби сите три, победувајќи со 7:6(1), 7:6(3), 7:6(4).
Во првото коло е елиминиран 20-от носител Американецот Себастијан Корда, во дуел со дури четири тај-брејка. Французинот Џовани Мпетши Перикар беше подобар со 7-6(5), 6-7(4), 7-6(6), 6-7(4), 6-3.
