На судењето за трагичниот случај на смртта на Ивана Јовановска, вештакот по судска медицина Златко Јаќовски сведочеше за наодите од обдукцијата и токсиколошките анализи. Тој презентираше информации за Ивана, но и за Стојанче Јовановски. Сведочењето на Јаќовски покажа дека, освен повредите предизвикани од падот од зградата во скопското Тафталиџе, кај Ивана биле откриени и крвни подливи на брадата и вратот, кои потекнуваат од удар од тврд предмет. Дел од овие повреди, според неговото сведочење, се појавиле десет дена пред нејзината смрт, а дел истиот ден или еден ден претходно. Обдукцијата не утврдила присуство на алкохол или други психоактивни супстанци во нејзиниот организам.
Во однос на Стојанче Јовановски, анализите покажале присуство на кокаин и лекови за смирување. Вештакот нагласи дека во урината е наоден кокаин со концентрација од 307,5 нанограми на милилитар, како и бензодиазепини со концентрација над 1000 нанограми на милилитар. Дополнително, утврдени се и дијазепам, нордијазепам и метаболит на кокаин.
Обвинителството го товари Стојанче Јовановски дека ја навел сопругата Ивана на самоубиство, во периодот на нивната бракоразводна постапка, загрозувајќи ѝ ја сигурноста и наборат телесни повреди при семејното насилство. Според обвинението, Ивана Јовановска и нејзината шестгодишна ќерка Катја загинале на 2 март годинава по падот од балкон во скопската населба Тафталиџе.
