Србинка продаде картон за јајца како кулер за лаптоп

Дека се е во маркетингот и добриот пристап кон купувачите, доказ е и оваа продажба на еден од популарните српски веб сајтови за интернет трговија. Имено, една корисничка продаде картон за јајца како кулер за лаптоп.

Продавачката осмислила име, слоган и соодветен полу-сериозен текст во огласот за кулерот наречен ПЕЛЕНО. Еве како го опишала:

– Поефтин нема
– Еколошки – нема ама баш никакво штетно зрачење
– Лесен, ќе уживате во користењето било да сте во фотелја, кревет или каде и да користите лап-топ
– Економичен, не му е потребна никаква енергија, ниту пак зафаќа USB влез на лап-топот
– Нема ништо што може да се расипе (освен ако не го полиете со огромна количина течност), а и да се расипе, ништо полесно од тоа да најдете нов
– Одговара на сите големини на лаптоп, од 9 до 19 инчи

„Покрај сите набројани карактеристики, најважно е што ПЕЛЕНО кулерот е АПСОЛУТНО ЕФИКАСЕН! Ништо помалку од светлечките, гломазни, зујачки и останати кулери што се достапни на пазарот. Сите опишани предности на овој кулер се востановени преку долгогодишно искуство и користење. Се одлучив да се откажам од овој прв, колекционерски примерок во корист на победникот на лицитацијата“, се вели во необичниот оглас.

Иако целава работа личи на шега, продавачката доби дури 32 понуди. Првата била 199 динари (97 МКД), а продаден е за 1010 динари (494 денари).

Па ете, малку се посмеавме, а по нешто и научивме.