Српскиот претседател Александар Вучиќ денеска ќе присуствува на испраќањето на помошта од медицинска опрема за борба против Ковид-19 која Србија ќе ѝ ја донира на Италија.
Како што соопштија од прес службата на Вучиќ, помошта ќе полета од аеродромот „Никола Тесла“ во 12.30 часот.
Помошта Вучиќ ја најави вчера, по состанокот со претставниците на ЕУ и амбасадорите на земјите членки. Вучиќ им соопшти на новинарите дека разговарал со гувернерот на италијанската покраина Венето – Лука Заја, и дека му понудил помош на регионот во „моменти кога тоа е тешко и важно“.
„Верувам дека со своето однесување во регионот покажавме дека можеме да ја понудиме својата солидарност и помош и на оние со кои не разменуваме секогаш најубави зборови“, рече Вучиќ.
Српскиот претседател истакна и дека Србија има нешто повеќе заштитна опрема отколку што ѝ е потребна, па и нешто повеќе респиратори отколку што ѝ се неопходни сега, укажувајќи дека Србија е подготвена, ако тоа ѝ е потребно на било која земја членка на ЕУ, да им испрати помош во рок од 12 часа.
Вучиќ претходно, во име на Србија, ѝ се заблагодари на ЕУ за помошта во борбата против коронавирусот во износ од 93 милиони евра, од кои 15 милиони за медицински потреби, а 78 милиони евра за поддршка на економијата, но и за солидарноста за време на поплавите во 2014 година.
