Собранието го усвои амандманот за бришење на членот 13 од Предлог-законот за изменување и дополнување на Законот за јавни набавки, со што се прифаќаат укажувањата на претседателката Гордана Сиљановска-Давкова.
Амандманот на 129. седница го поднесоа пратениците Бојан Стојаноски, Дафина Стојаноска и Бране Петрушевски. Стојаноски рече дека измените се дел од Реформската агенда и дека со дигитални алатки и вештачка интелигенција треба да се унапреди системот на јавни набавки, да се намалат ризиците од корупција и злоупотреби и да се забрза реализацијата на инфраструктурните и другите проекти.
„Со бришењето на овој член комплетно ги прифаќаме указите од претседателката и сметаме дека овој закон може непречено да биде усвоен, да го олесниме системот и да го направиме попрактичен, позаконски, потранспарентен и поцелисходен за целата државна управа“, изјави Стојаноски.
Пратеникот на СДСМ Фатмир Битиќи рече дека опозицијата уште во комисиската расправа предложила бришење на членот 13 и други амандмани. Тој оцени дека законот се носи без јавна расправа и дека требало да биде повлечен, по што да се поднесат нови измени со организирана јавна расправа.
„Ова е можеби прв пат Законот за јавни набавки да се носи во собраниска процедура без јавна расправа. Подостоинствено ќе беше да го повлечете законот, да поднесете нови измени и да има јавна расправа, наместо да велите дека еве, сте ја послушале претседателката зашто таа кажала дека ова е противуставно“, изјави Битиќи.
Претседателката на 4 ноември го извести Собранието дека нема да го потпише указот за измените усвоени на 26 октомври, по анализа и консултации со експерти. Нејзиното вето се однесуваше на одредбата за мандатот на претседателот и членовите на Државната комисија за жалби по јавни набавки.
За предлог-законот се поднесени вкупно 2.158 амандмани, од кои најголемиот дел се од СДСМ.
