Само за три месеци,во кои Собранието не работеше под полна пареа, четириесет и пет пратеници кои не живеат во Скопје, инкасирале околу 74 илајди евра од буџетот, покажуваат податоците за исплатен надоместок за патни трошоци, кои Телевизија 24 ги обезбеди согласно Законот за пристат до инфорамции од јавен карактер-информира ТВ24.
На име на патни трошоци најмногу зел пратеникот на ВМРО-ДПМНЕ Крсто Мукоски, кој е еден од пратениците коишто ги отворија вратите на Собранието на 27 април кога толпа упадна во законодавниот дом и ги нападна пратениците. Мукоски живее во Вевчани и за деновите кога биле одржувани пленарни или комисиски седници за одење и враќање од работа, наплатил речиси 3 илјади евра, само за три месеци.
Неговиот сопартиец, но и исто така учесник во отворањето на вратите на Собранието на 27 април, Сашо Василевски, за патувањето од Охрид до Скопје побарал да му бидат исплатени 2 644 евра. И нивните колешки од Битола, Лилјана Затуроска и Лилјана Кузмановска за патни трошоци побарале околу 2 500 евра секоја. И Зоран Илиоски од ВМРО-ДПМНЕ потрошил 2 492 евра за да присуствува на собраниските седници.
Спикерот Талат Џафери кој живее во Гостиварско, според распоредот на активности кои ги имаше откако беше именуван, средби во Собранието и пленарни седници за три месеци наплатил илјада евра за патни трошоци.
И пратениците од владејачкото мнозинство не ја штеделе државата. Од СДСМ на име на патни трошоци најмногу наплатил координаторот на пратеничката група на СДСМ, Томислав Тунтев кој за неговото патување од Охрид до Скопје за три месеци зел 2 588 евра. И неговиот колега од Битола Васко Ковачевски побарал 2 514 евра за патни трошоци. Над 2 500 евра за три месеци за патни трошоци побарале Јован Митревски и Сашо Поцков од СДСМ.
Интересно е да се спомене дека само за еден работен ден на 30 декември минатата година кога беше одржана конститутивната седница овие 45 патеници потрошиле 3 200 евра. Најмногу пари побарал Мукоски, 130 евра само за еден ден – со тие пари според пресметките може да се наполни 126 литри бензин еуросупер 98 со кој при просечна потрошувачка може да се поминат повеќе од 1.000 километри. Но, методоглогијата на пресметка им дозволува на пратениците да земаат вакви суми за патни трошоци.
И во март месец Собранието одржало само пет пленарни седници кои буџетот го чинеле 16 илјади евра само за патни трошоци. Поактивна е работата на пратениците во април кога и има и најмногу направени трошоци, а помалку работа имало и во мај освен за Џафери кој имал повеќе средби со странски претставници во Собранието.
Извор,ТВ24
