Музејот во Шангај ова лето привлече маса луѓе на изложбата на древни египетски реликвии, вклучувајќи статуи и слики на мачки, а во саботата вечерта им дозволува на 200 посетители да ги донесат своите четириножни миленици.
Инспириран од древното египетско обожување на божицата на заштитата Бастет, која честопати била прикажувана како мачка, музејот им даде можност на мачките да учествуваат во дел од изложбата наречена „Тајните на Сакара“.
„Египетските археолошки тимови пронајдоа храм за мачки во Сакара и откопаа бројни мумии и статуи на мачки. Идејата за „Ноќ на мачките“ ја добивме при планирањето на настанот бидејќи темата на настанот се мачки“, изјави заменик директорот на Музејот во Шангај, Ли Фенг.
Изложбата под насловот „Врвот на пирамидите: Изложба на древната египетска цивилизација“ беше отворена на 19-ти јули годинава и ќе трае до 17-ти август следната 2025 година, а „Вечерта со мачки“ е закажана за најмалку десет саботи. Досега се одржани шест такви настани, а секој пат биле распродадени сите 200 билети со кои може да се донесат мачки.
Посетителите ги носат своите мачки во носачи или колички за миленичиња и можат да ги изнесат само на одредени места, на пример за да се фотографираат до статуата на Бастет. Мачките се проверуваат при влезот за да се осигура дека се вакцинирани и дека не покажуваат знаци на болест или стрес. Музејот има ветеринари и места за одмор за мачки во случај вечерта во музејот да биде премногу за нив.
„Многу е посебно што можете да ја земете мачката со себе“, рече посетителката Киу Џиакаи, која присуствуваше на „Вечерата со мачки“ со својата мачка Ан Мао.
„Го слушав воведот на нараторот кој рече дека многу од денешните мачки се поврзани со мачки припитомени во древниот Египет. Затоа мислев дека ќе треба да ја донесам мојата мачка овде за да ги видам моите предци и божицата на мачката“, додава таа.
