Малата фигура на плодна жена, изрезбана од слонова коска, која неодамна е пронајдена во неколку делови, во пештера во Германија, можеби е најстарото уметничко дело во светот.
Малата фигура најдена во пештерите Хохл Фелс во Германија можеби е најстарото уметничко дело во светот. Археолозите ја пронашле оваа статуетка распарчена на шест дела, а откако ја составиле, со јаглеродното датирање, откриле дека се работи за предмет стар околу 35 илјади години.
Се работи за фигура изрезбана во слонова коска, која претставува симбол на плодноста – жена со широки колкови, зголемен стомак и големи, набрекнати гради.
Николас Конрад, археологот кој дојде до ова неверојатно откритие објаснува дека се работи за типична статуетка од времето во кое се гаел култот кон плодноста, а ова парче уметност со должина од нецели 6 сантиметри веројатно служело како приврзок или амајлија, со оглед на тоа што има жлеб на кој се прикачувала врвка. Левата рака сè уште не е пронајдена, но Конрад се надева дека ќе успеат да ја најдат кога ќе довршат со пребарувањето низ остатоците од пештерата.
Ова откритие ги поместува нештата кои ги знаевме за светот на уметноста и неговите почетоци за неколку илјади години наназад.
