Економскиот ангажман на Кина на просторите на Балканот предизвикува сé поголема загриженост кај Европската унија, вели еврокомесарот Јоханес Хан – задолжен за односите на Унијата со југоистокот на Европа.
Кина долго се претставуваше како земја која само ги следи своите бизнис интереси, но случајот е обратен; Пекинг го извезува и својот национален модел, рече Хан синоќа на средбата на водечките бизнисмени од германско говорно подрачје која се одржа во австрискиот зимски центар Лех.
Одговор на предизвиците од Кина
Изборот е меѓу европската демократија и пазарниот капитализам, од една страна, и диктатурата и непречениот капитализам – од друга, рече Хан.
Тој ја повика Европската унија да најде соодветен одговор на предизвиците од Кина.
„Би можеле да го преиспитаме кинеското купување на стратешки важните компании“, истакна Хан.
Изградбата на електрани, автопатишта и мостови во шест земји од Западниот Балкан се финансира, според Хан, со кинески пари.
Тој повтори дека надворешната политика на ЕУ треба да стане побрза и поприлагодлива, а тоа, според Хан, значи дека едногласното носење на одлуки по прашањата за надворешните работи треба да се замени со носење на одлуки со мнозинство гласови на членките.
„Тоа е предуслов за конкурентноста на глобално ниво“, заклучува Хан.
