НАСА официјално ја заврши мисијата на вселенскиот телескоп „Свифт“ откако приватниот сателит за негово спасување не успеа да се спои со него во орбитата. Телескопот, кој тежи еден и пол тон, сега паѓа кон Земјата, а поголемиот дел од него се очекува да изгори во атмосферата.
Главниот научник на мисијата во НАСА, Бред Ценко, објаснува дека иако најголемиот дел од телескопот ќе изгори при повторното влегување во атмосферата, одредени компоненти изработени од волфрам и делови од огледалата би можеле да го преживеат падот. Се претпоставува дека овие остатоци ќе завршат во океанот, додека можната зона на паѓање опфаќа делови од Африка, Австралија, Индија, Југоисточна Азија, како и Централна и Јужна Америка. Вселенските континуирано ја следат траекторијата на телескопот.
Мисијата траеше 22 години, од лансирањето на 20 ноември 2004 година. „Свифт“ беше дизајниран да ги истражува најмоќните експлозии во вселената, вклучувајќи ги изблиците на гама-зрачење и суперновите. Џон Нусек, астроном од Државниот универзитет во Пенсилванија и раководител на контролниот тим на мисијата, изјави: „Знаевме дека овој ден ќе дојде уште пред лансирањето на Свифт. Барем кога станува збор за ниската Земјина орбита, важи правилото дека сè што ќе биде испратено горе, мора и да се врати. А тој крај е катастрофален“.
Поради зголемената сончева активност, телескопот почна да губи височина побрзо од очекуваното. НАСА ја ангажираше компанијата „Каталист Спејс“ за итна мисија за спасување пред една година. Роботското летало „Линк“, опремено со три крака, наиде на технички проблеми по неговото лансирање во јули 2026 година. Тоа не успеа да се приближи на помалку од 12 до 15 километри до телескопот, а во септември 2026 година самото падна назад на Земјата.
Откако мисијата за спасување беше откажана, „Свифт“ продолжи со работа и регистрираше нови изливи на гама-зраци и други појави со висока енергија. Сепак, кон крајот на октомври 2026 година, телескопот се спушти премногу ниско за стабилно работење, што доведе до исклучување на неговите системи.
Евиденцијата на мисијата опфаќа податоци за повеќе од 2.000 експлозии на гама-зраци, 1.400 ѕвездени експлозии, како и многу комети, астероиди и црни дупки што голтаат ѕвезди. НАСА го сметаше „Свифт“ за клучен претходник на телескопите Хабл и Веб, кои ги користеа неговите брзи предупредувања за спроведување подетални студии. Научниците сега разгледуваат начини како да се надомести загубата на таа способност за брза реакција. „Се надеваме дека искуството стекнато од успехот на Свифт ќе им помогне на новите генерации вселенски мисии побрзо да дојдат до откритија за вселената“, изјави Нусек во електронска порака.
