Алијанса за Албанците и Алтернатива ќе почекаат до следната недела Левица да покаже разбирање и да престане со блокадата на предлог-законот за државјанства и да продолжи разгледувањето на собраниската Комисија за одбрана и безбедност, а доколку тоа не се случи, ќе одат на план „Б“ – ќе го поднесат со европско знаменце на усвојување по кратка постапка.
Според пратеникот и претседател на Левица – Димитар Апасиев, невозможно е законот да помине со европско знаменце, пред сѐ бидејќи претседателот на Собранието – Талат Џафери, ќе мора да го отфрли.
„Законот не може да оди со европско знаменце, оти не постои ЕУ регулатива со која би се усогласил и оти е спротивен на Европската конвениција за државјанства. Ако пробаат така, спикерот Џафери ќе мора да им го отфрли. Во спротивно прави кривично дело и ќе одговара“, порача Апасиев.
Според пратеникот Халил Снопче од Алијанса за Албанците, Апасиев и Крмов погрешно ја разбрале процедурата за предлог, па оттаму очекува да се повлечат и, како што вели, „да се ангажираат за она што го велат – дека се за заштита на правата на граѓаните и за реализација на основните права“.
„Ние ќе инсистираме да дадеме уште една шанса. Но ако гледаме дека навистина има блокади, сигурно ќе одиме на втората варијанта преку европско знаменце. Зошто? Затоа што прво – имаме согласност од страна на Владата, и второ – навистина се работи за човекови права. И трето – сигурно според сите европски и меѓународни конвенции нема логика да има луѓе без државјанство во ниту една држава, а ние имаме луѓе што се без државјанство“, изјави тој.
Според него, сите нивни аргументи, како предлагачи на измените на законот, речиси збор до збор ги потврдил и јавниот правобранител (Насер Зибери) во последниот извештај.
Разгледувањето на предлог-законот во Комисијата за одбрана и безбедност беше прекинато поради најавата на Апасиев дека е подготвен да руши и лични рекорди во говорење и молчење, сѐ со цел да ја спречи, како што рече, „неправдата“.
