Двете боксерки во центарот на спорот за полот на Олимпијадата во Париз ќе останат во натпреварувањето се додека победуваат, бидејќи ги исполнуваат сите критериуми за подобност, објави во понеделникот Меѓународниот олимписки комитет (МОК).
Тајванката Лин Ју-тинг и Алжирката Имане Келиф се двете боксерки кои добија забрана за учество на минатогодишното светско првенство откако ДНК тестовите покажаа присуство на машки XY хромозом.
Тие беа суспендирани од Меѓународната боксерска федерација (ИБА), но им беше дадена дозвола да се натпреваруваат во Париз, бидејќи боксерската програма ја води Меѓународниот олимписки комитет откако ја суспендираше ИБА во 2023 година поради менаџерски и финансиски прашања. МОК ги оспори методите што ги користи ИБА, потврдувајќи ја исправноста на нејзините регулативи.
„Овие спортисти без проблем се натпреваруваат во сениорски дисциплини шест години. Овие жени се квалификуваа за овој настан, остануваат квалификувани за овој настан и се натпреваруваат на овој настан“, рече портпаролот на МОК, Марк Адамс.
МОК ги отфрли резултатите од тестовите спроведени од ИБА како произволни и нелегитимни, велејќи дека нема причина да ги спроведе.
„Не можам да ви кажам дали беа веродостојни или не (тестовите за полот) бидејќи изворот од кој дојдоа не беше веродостоен и основата за тестовите не беше веродостојна“, рече Адамс.
„Од таа причина немаше размислување дали тие се точни или не, бидејќи тие немаа никакво влијание врз соодветноста на боксот овде“, додаде тој.
И двете боксерки обезбедија најмалку бронзени медали, Лин Ју-Тинг во категоријата до 57 килограми и Келиф во категоријата до 66 килограми.
На овие игри, МОК ги користи боксерските правила кои беа применети на Олимписките игри во 2016 и 2020 година и во нив не е вклучено родово тестирање.
