„Четири години политиките што ги реализира СДСМ носат успеси и радости и на домашен, и на меѓународен план“, порача секретарот за меѓународна соработка на СДСМ – Бојан Маричиќ, на трибината „Најдоброто за нашата општина“ во Ресен.
„Пред четири години бевме изолирана држава која се плаши од своите соседи, држава која мислеше дека сите ѝ се непријатели, држава која не веруваше во својата иднина. Денес, ние сме членка на НАТО, нашето знаме се вее пред седиштето, очекуваме да ги почнеме преговорите со ЕУ. Во сите тие преговори влеговме со самодоверба, со јасен идентитет како Македонци кои зборуваат македонски јазик. И како такви ќе влеземе и во ЕУ, ќе успееме во обезбедувањето на нашата европска перспектива“, порача Маричиќ.
Според него, концептот на СДСМ – „Едно општество за сите“, сега е концепт кој се прочу низ целиот свет. ВМРО-ДПМНЕ, од друга страна, обвини тој, продолжува со концептот кој носи само блокади, изолација и корупција. Затоа довербата на граѓаните кон СДСМ ќе продолжи да расте, констатира Маричиќ.
