Најдобриот македонски автомобилист, Игор Стефановски – Иџе, победи и на трката во Швајцарија и на две трки пред крајот на шампионатот ја обезбеди титулата најдобар на Стариот Континент.
Македонскиот автомобилиски ас, Игор Стефановски – Иџе е нов европски шампион на ридски патеки во категорија 1. Тој победи на десеттата трка од Европскиот шампионат на ридски патеки во Швајцарија и две трки пред крајот на сезоната ја потврди доминацијата во групата Н.
– Се уште не верувам дека јас и мојот мал тим стигнавме до титулата. Се надевам дека со еден ваков голем успех ја израдувавме Македонија. Време е конечно да „издишам“, да се израдувам на постигнатото, бидејќи досега се беше на брзање и не ги почувствував победите на вистинскиот начин. Сега е се поинаку и уживам во овие прекрасни моменти. Им се заблагодарувам на фановите за поддршката и на спонзорите кои одвоија средства за да овозможат Македонија да се пофали со европски шампион во автомобилизам, изјави популарниот Иџе.
„Летечкиот Македонец“ патеката Cote St.Ursanne-Les Rangiers, долга 5.169 метри, ја помина за 2:18.799 и 2:17.307 минути и имаше скоро три секунди подобро време во секој настап пред Чесите, Мартин Јерман (2:21.228 и 2:20.351) и најголемиот конкурент за титулата Јири Лос (2:19.599 и 2:22.756 минути). Нивниот сонародник Јаромир Мали победи во групата А (2:17.108 и 2:16.043), но Иџе со седмиот триумф годинава направи недостижна предност за конкурентите и на Македонија и ја донесе првата европска круна во автомото спортот.
– Во Швајцарија ми беше потребно второто место, но јас возев во свој стил, без калкулации. Патеката на прв поглед изгледа лесна, но е многу опасна и многу возачи излетаа. После толку напор и труд конечно стигнав до титулата. Пресреќен сум, додаде Стефановски.
