Грчката кошаркарска репрезентација се пласираше во финалето на квалификацискиот турнир за летните Олимписки игри во Париз, откако беше убедлива против Словенија во полуфиналето во Пиреја, победувајќи со 96:68 (32:14, 15:19, 19:17, 30:18).
За настапот во Париз, грчките кошаркари во неделното финале ќе се борат против победникот од втората полуфинална средба од оваа група, во која се среќаваат Хрватска и Доминиканската Република. Тој натпревар е на програмата во сабота во 20 часот.
Од самиот почеток на натпреварот Грција беше во предност против Словенците, а дуелот го отвори со серијата од 13:0 со седум поени на Јанис Адетокумбо. Словенците не успеаја да се соземат од лошиот старт и големиот пораз од Хрватска и на крајот од првата четвртина имаа негатива од дури 18 поени (14:32), а најдобриот словенечки играч Лука Дончиќ постигна само два поена во тој дел од натпреварот.
На почетокот на втората четвртина Грција водеше со повеќе од 20 поени разлика, но Словенците конечно се разбудија и по 20 минути игра имаа негатива од 14 поени (33:47).
Во текот на целото второ полувреме, домаќинот Грција рутински ја држеше предноста, го држеше противникот на голема дистанца и мирно обезбеди финале, меч за пласман на Олимписките игри.
Во последниот дел Грција побегна на плус 30, па главната домашна ѕвезда Аетокумбо можеше да одмори за неделното финале. Натпреварот го заврши со 13 поени и четири скока. Најдобар кај Грците беше Томас Волкап со 19 поени и шест скока, а Ник Калатес имаше девет поени и 11 асистенции.
Словенија ја предводеше Лука Дончиќ со 21 поен, седум скока и пет асистенции. Но Дончиќ имаше дури десет загубени топки.
