Основниот кривичен суд – Скопје го прифати предлогот на Основното јавно обвинителство за организиран криминал и корупција, за определување мерка притвор во траење од 30 дена против Сашо Мијалков, обвинет во предметот „Плацови на Водно“.
„Постапувајќи по предлог на Основното јавно обвинителство за организиран криминал и корупција, за определување мерка притвор против С.М. обвинет во предметот со КОК бр. 63/21 во јавноста познат како ‘Плацови на Водно’, а имајќи ја предвид итноста на постапката, Кривичниот совет, по добивање на предметот, одржа седница на советот и донесе решение со кое го прифати предлогот на јавниот обвинител и на обвинетиот му определи мерка притвор во траење од 30 дена“, се вели во соопштението од Основниот кривичен суд.
Од Основниот кривичен суд додаваат дека Советот смета оти се исполнети условите од член 165 став 1 точка 1, односно дека постои опасност од бегство, а решението е во фаза на експедирање до странките во постапката кои имаат право на жалба пред Апелациониот суд Скопје.
Основното јавно обвинителство попладнево поднесе Предлог за определување на мерка притвор за Сашо Мијалков, по обвинение за „перење пари и други приноси од казниво дело“ во предметот „Плацовите на Водно“, откако претходно Апелацискиот суд во Скопје ја прифати гаранцијата од 11.106.501 евра со што на поранешниот директор на УБК мерката притвор за случајот „Трезор“ (каде е неправосилно осуден на осум години затвор) му беше преиначена во мерки за претпазливост, односно одземање на пасошот и обврска да се јавува во суд. Мијалков има првостепена пресуда и во случајот „Таргет – Тврдина“ со која е осуден на 12 години затвор, а обвинет е и во случаите „Плацови на Водно“ и „Титаник 2“, а осомничен е и во предметот „Империја“. Во „Тортура“, пак, доби ослободителна пресуда.
Извор: МИА
