Не може едно дете што започнало да оди во училиште уште од прво одделение да го учиш дека Бугарите се фашисти, окупатори итн. – зборуваше Каракачанов во вчерашното гостување во „Денот започва“ на бугарската БНТ, без да објасни, меѓутоа, дали мисли на оние исти првачиња кои цртаа полжави и коси црти во тетратки со тесни и широки линии, или на некои други, негови замислени македонски првачиња.
Не може да крадеш историја, истата да ја фалсификуваш и така да развиваш омраза кон соседна земја, упорен е бугарскиот вицепремиер.
„Бугарите се фашисти, окупатори, убијци и што ли не, а за Македонците таму ќе прочитате дека небаре од Свети Павле постојат. И Исус бил Македонец, не знаевте?“, саркастичен беше во интервјуто министерот за одбрана на Бугарија.
„Таа нивна политика, таканарачарен нов идентитет, таа е измислена… има документи, ’33 – ’34 година во Москва, наложена со крв и насилство во ’44-та година од Титова Југославија“, се надоврза Каракачанов на своите претходни тези, па ги прозва и македонските политичари:
„Ти не можеш мене да ми кажуваш ‘Ама ние така се чувствуваме’. Супер, ти чувствувај се како сакаш, само што јас сакам да бидеш политичар кој размислува европски – зборувам за скопските политичари. Изгради си го својот идентитет на база на автентичните факти од твојата историја; и започнувате од Тито, т.е. со Коминтерната, простете, Сталин, Тито… Бидете така добри да ги рехабилитирате оние илјадници луѓе кои беа убиени во Македонија, кои беа Бугари. А тоа беше елитата на тоа општество: учители, професори, свештеници, трговци. Таа елита беше уништена, или пратена во затворите – тоа не ли е факт од историјата. А не некаков мулти-не-знам-си-каков модел“, рече Каракачанов.
