„Од досегашното искуство кое го имаме во Антикорупциската комисијата гледаме дека не секогаш оној кој се стекнува со имот, го става имотот на свое име. Тоа е најголемиот проблем што сега можеме да го истакнеме. Значи, се врши дисперзија на имотот на некои други блиски роднини во фамилијата, дури и не мора да се блиски како семејство, може да се блиски пријатели“, вели претседателката на Државната комисија за спречување на корупција (ДКСК, ака. Антикорупциска) – Билјана Ивановска, во интервју за „Слободен печат“.
Според неа, токму од овие причини, антикорупционерите се едногласни и ќе бараат од новиот парламент, како што вели, да смогне сили и политичка волја, за да донесе Закон за потекло на имотот на сите граѓани.
„Дури тогаш ќе имаме темелна слика за тоа каде е имотот и кој располага со имотот. Тоа може да се направи и ќе биде голем чекор напред за сите, за нашата држава“, вели Ивановска.
Во интервјуто, првиот човек на Антикорупциска посочува и дека новите пратеници од овој парламентарен состав, како и оние во заминување, ќе пополнуваат анкетни листови на стариот начин како и досега, иако веќе требаше да биде изготвен електронски софтвер и со тоа и образец, согласно новиот Закон за спречување на корупција и судир на интереси, кои ќе овозможат историски да се следат промените во имотната состојба на избраните лица. Доцнењето на овој систем, вели Ивановска, е од повеќе причини, меѓу кои и повлекувањето на проектот поддржан од УСАИД.
Прашана за надлежностите на Антикорупциска околу пратениците на кои им завршил мандатот, а се збогатиле за време на „служењето на народот“, Ивановска признава дека со актуелниот закон ДКСК нема законска можност да се занимава со функционери на кои веќе им завршил мандатот. Во предлог-законот, вели, постоел предлог пратениците и функционерите да се следат и во период од две-три години по завршувањето на мандатот, но со законот, ваков каков што е изгласан, Антикорупциска „нема обврска, ниту можност било што да презема за функционерите на кои им завршил мандатот“, вели претседателката на комисијата.
Прашана зошто тогаш како и новите – и пратениците на кои им завршува мандатот пополнуваат анкетни листови, Ивановска, избегнувајќи директен одговор, најави дека ДКСК од новото Собрание ќе бара трајно решение. Целото интервју и повеќе детали прочитајте ТУКА.
