Мегават-час гас за испорака во декември се тргуваше за 103,43 евра на холандската берза TTF попладне во петокот, најскапата од средината на декември 2022 година. Беше за 5,6 отсто поскап од вчерашното затворање.
Зголемувањето на цената на гасот отвори дебата за мерките за ограничување на скокот на цените, а воедно и зачувување на европскиот пазар, забележува Reuters.
Италијанската влада со месеци лобира кај Европската комисија да ѝ дозволи да користи буџетски пари за намалување на трошоците за гас и електрична енергија за домаќинствата и бизнисите.
Зборувајќи на конференцијата „Montel Italian Energy Day“ во Милано, Алесандро Ноче, главен директор за енергетските пазари при Министерството за енергетика, рече дека Рим потрошил стотици милиони евра за полнење на своите складишта за гас пред зимата.
„Во меѓувреме, Германија го одложи полнењето на своите складишта и се фокусира на приватизација на енергетските групи Uniper и SEFE, клучни играчи во процесот“, рече италијанскиот функционер.
„Вознемирен сум кога слушнав дека една европска земја одлучила да не ги полни своите складишта затоа што сака да приватизира компанија“, рече Ноче.
„Двојно сме погодени. Плативме 300 милиони евра за да го пополниме складишниот капацитет, а сега плаќаме повеќе за гас затоа што Германците го купуваат… тоа навистина ме лути“, додаде функционерот на италијанското министерство за енергетика.
Германскиот регулатор во четвртокот соопшти дека складиштата се полни со 61,7 отсто. Според податоците од здружението Гасна инфраструктура Европа (GIE), италијанските складишта се полни со речиси 91 отсто, додека просекот на ЕУ е околу 75 отсто.
Во писмена изјава за Reuters, германското Министерство за економија изјави дека зимските резерви на гас се безбедни, и покрај тоа што нивоата на залихи во складиштата се значително под законската цел за 1-ви ноември. Министерството соопшти дека не се очекува недостиг на гас во Германија оваа зима.
Владата во Берлин презеде дополнителни мерки на претпазливост, вклучително и зголемено вбризгување гас во складиштата и тендер за обезбедување резерви во втората половина од зимата. Некои од овие мерки нема да стапат во сила сè до по 1-ви ноември, соопшти Министерството.
Министерството, исто така, ги потврди плановите за замена на задолжителните цели за капацитет на складирање со национални стратешки резерви на гас.
Италијански функционер предупреди дека цената на гасот на TTF може да достигне помеѓу 150 и 180 евра за мегават-час доколку јануари е студен.
„Сè зависи од времето. Мораме да ‘навиваме’ за глобалното затоплување и да се надеваме на топол јануари. Доколку јануари е студен како минатата година, особено во Полска, Литванија и северна Германија, ќе има проблеми“, рече Ноче.
