Хотелот Hard Days Night се отвори во февруари 2008 во Liverpool, има 4 ѕвезди и 110 соби со безброј занимации за сите Beatles фанови. Секоја од собите е тематски определена од значаен настан, песна или место поврзано со легендарната четворка. Овој хотел нуди одлични услови за престој, а ви дава и суптилен увид во парче од животите на четворицата музичари.
Интересно е и тоа што помалиот брат на Paul, фотографот Mike McCartney направи ексклузивна серија фотографии кои ги документираа клучните етапи во изградбата на хотелот.
Покрај многуте Beatles елементи, се издвојуваат и оригиналните дела на уметникот Shannon кои може да се видат низ рестораните, барот и во секоја од собите и ја претставуваат таканаречената Shannon Collection.
Хотелот не е неподнослив за оние кои не се опседнати со бендот. Иако се многу на број, сепак нештата кои се тесно врзани со Beatles се умешно претопени во целиот амбиент.
Ѕидовите на другиот ресторан, кој има посебен влез за оние кои не престојуваат во хотелот, се украсени со дела инспирирани од обвивката на албумот Sgt. Pepper’s Lonely Hearts Club Band.
Може да одберете и да престојувате во еден од двата луксузни апартмани наречени Lennon и McCartney, кои имаат пространи соби, голема тераса и најдобар поглед, а секако сето тоа е збогатено со многубројни нешта поврзани со двајцата музичари.
