Тимот на Мекларен ќе му даде предност на Ландо Норис пред тимскиот колега Оскар Пјастри во борбата за титулата во Формула 1 со Макс Верстапен од Ред Бул, изјави за BBC во четвртокот директорот на тимот Андреа Стела.
Британецот Норис е втор во генералниот пласман и 62 поени зад трикратниот светски шампион Верстапен со осум преостанати трки, плус три спринтерски трки, додека Австралиецот Пјастри е четврти и 106 поени зад лидерот. Остануваат да се освојат максимални 232 бода во шампионатот на возачи.
Мекларен ги брка двете титули и би можел да биде на врвот на поредокот на конструкторите на Големата награда на Азербејџан овој викенд во Баку, бидејќи заостануваат само осум поени зад некогаш доминантниот Ред Бул.
„Општиот концепт е дека ние сме неверојатно решени да победуваме, но сакаме да победиме на вистински начин. Ќе ја фокусираме нашата поддршка на Норис, но сакаме да го направиме тоа без премногу компромиси со нашите принципи. Нашите принципи се дека интересот на тимот е секогаш на прво место. Спортскиот дух ни е важен во севкупниот начин на кој одиме на тркање. И тогаш сакаме да бидеме чесни кон двајцата возачи“, рече Стела за британскиот радиодифузер.
Стела рече дека во Мекларен сакале да избегнат повторување на ситуацијата во Монца каде што Норис ја освои пол позицијата додека Пјастри беше втор, но на крајот загуби од Шарл Леклер од Ферари. Поранешниот инженер на Ферари рече дека двајцата негови возачи ја прифатиле ситуацијата.
„Разговорите беа многу кооперативни. Дури и кога му реков на Оскар, дали би бил подготвен да се откажеш од победата? Тој рече: ‘Тоа е болно, но ако е правилното нешто да се направи сега, јас ќе го направам тоа’“, додаде Стела.
