ЕВН Македонија отвори прв полигон за обучување на млади електромонтери и електротехничари во Гостивар, во рамки на Општинското средно техничко училиште „Гостивар“. Полигонот е дел од проектот за дуално образование „Учење преку работа“.
Новиот надворешен полигон ја надополнува училишната училница која веќе располага со современи материјали, алати и опрема за низок и среден напон, идентични на оние што ги користат екипите на Електродистрибуција на терен.
Според ЕВН Македонија, преку учењето и работата на полигонот и во кабинетот, младите ќе добијат можност да се обучуваат според европските стандарди и во безбедна средина. Сашо Салтировски, управител на Електродистрибуција, рече дека инвестирањето во младите технички кадри е долгорочен стратешки приоритет на компанијата.
Фисник Осеку, прокурист и раководител на Човечки ресурси и организација при ЕВН Македонија, изјави дека донацијата треба да им помогне на учениците да го реализираат својот потенцијал и да се подготват за почеток на кариера во енергетскиот сектор.
Директорката на ОСТУ „Гостивар“, Теута Минахи, посочи дека партнерството со ЕВН им овозможува на учениците да ги развиваат своите вештини на современ полигон со квалитетна опрема и да станат конкурентни на пазарот на трудот.
Соработката меѓу ЕВН Македонија и училиштето трае од 2013 година. Во 2019 година била отворена првата дуална паралелка за профилот „Електричар – електромонтер на електрични мрежи“, а од 2025 година таа е проширена и со ученици од профилот „Електротехничар – енергетичар“.
Компанијата наведува и дека досега 211 ученици од ОСТУ „Гостивар“ ја реализирале практичната настава во корисничките енерго центри на Електродистрибуција во Гостивар и Тетово, во зависност од местото на живеење. Отворањето во Гостивар е продолжение на заложбите на ЕВН за унапредување на практичното образование, по сличен полигон изграден во 2019 година во СЕТУ „Михајло Пупин“ во Скопје.
