„Демократскиот сојуз е автентична политичка партија, препознатлива по своите принципиелни политички ставови. Демократскиот сојуз е партија која повеќе од 20 години ги брани и афирмира националните и државните интереси на Македонија, како и интересите на граѓаните.
Ние сме иницијатори и носители на проекти и закони за борба против криминалот.
Паушалните напади и плукањето по ДС станаа лоша практика на партијата Левица.
Ви порачуваме дека со плуканиците ќе направите кал и самите во неа ќе заглавите, слично или исто како што заврши Златна Зора (Хриси Авги) од Грција“, порачаа денеска од Демократскиот сојуз по обвинувањата од Левица.
„Македонија ќе цвета, да сте и вие чесни како што се чесни кадрите на ДС! Нo, треба да се провери работата на 4-те директори на Левица во претпријатијата и установите на Градот Скопје, како и тоа – од каде се финансира антимакедонската кaмпања што ја спрoведува Левица, обидувајќи се да ја насочи Македонија кон авторитарните режими. Само принципиелна политика е гаранција за опстојување вo политиката, екстремизмот и негацијата на сѐ и против сите, се сигурен пат кон буништето на историјата“, порачаа од партијата на Павле Трајанов.
„Во првите неколку месеци на новата власт, повторно се докажа погубната политичка пракса да се делат функции на пајтон партии, кои се дел од секоја власт. Последен во низа е случајот со Павле ТРАЈАНОВ од Демократски сојуз, кој ја доби функцијата Национален координатор за борба против тероризмот“, обвинија претходно од Левица.
„Освен што Павле Трајанов беше дел од власта на Заев и еден од поддржувачите на Преспанскиот договор, токму Трајанов беше силно напаѓан од ДПМНЕ за НЕПОТИЗАМ и КОРУПЦИЈА. Имено, во 2022 година ДПМНЕ обвинуваше дека ‘во Демократскиот Сојуз нема идеологија, само корист и трговија со влијание- службени автомобили, службени телефони и бесплатен паркинг, во замена за штетни закони’. Токму портпаролот Наум Стоилковски обвинуваше дека Павле Трајанов го користел јавното претпријатие ‘ГРАДСКИ ПАРКИНГ’ за вработување на негови роднини, кумашини и партиски функционери.
Потсетуваме дека ДПМНЕ го обвинуваше Павле Трајанов за афера, каде противзаконски бил користен бесплатен паркинг од функционерите на Демократски сојуз, со што бил оштетен буџетот на претпријатието.
Очигледно е дека на македонската политичка сцена повторно се случува реприза од 2017-та година. Како што во минатото Заев ги зеде под закрила сите криминогени елементи од власта на Груевски, така денес во владата на Мицкоски ги гледаме истите потрошени политичари, кои се приврзоци на секоја партија на власт. Наместо новата власт да ја расчисти аферата и криминалот кој се случувал во ‘Градски паркинг’ под директорување на Демократскиот сојуз, денес сведочиме како од оваа партија се назначуваат заменици-министри и координатори, како ‘награда’ што биле партнери во предавничкиот режим на ЗАЕВ“, порачаа од Левица.
