Дефектен премиер ставен на продажба на интернет

По објавувањето на „Панама Пејпрс“, анонимен корисник на eBay го постави пакистанскиот премиер Наваз Шариф на продажба. Незадоволниот (од работата на политичарот) продавач веќе доби понуда и од 90.000 долари.

„Бескорисниот пакистански премиер Наваз Шариф на продажба“, стои во описот под огласот, опишувајќи го Шариф како „нов, но со дефекти“.

„Не е во работна состојба. Никогаш не работел. Има недостатоци и не функционира од раѓање. Таква е целата серија на овие производи. И неговото семејство е со генетски недостатоци и корумпирано. Земете го и ослободете нé од оваа болест“.

Огласот експресно се рашири на Интернет; можеби затоа што во пакет со Шариф, како „подарок“ се нуди и неговиот брат Шабаз (гувернер на провинцијата Пенџаб)?

На посериозната страна, во аферата со „Панама Пејпрс“ се покажа дека многу членови на семејството на Шараф се поврзуваат со оф-шор компании, што предизвика големо незадовоство кај Пакистанците. Меѓу нив се споменати и трите деца на Шараф, за кои податоците велат дека поседуваат недвижности во Лондон, на име на една оф-шор компанија регистрирана преку „Мосак Фонсека“.