Данските ракометари, актуелни трикратни светски шампиони, ја потврдија надмоќта освојувајќи го второто олимписко злато со најубедливата победа во едно олимпиското финале, совладувајќи ја репрезентацијата на Германија во Лил со 39:26 (21:12).
Финалниот меч веќе беше решен во првата половина од првото полувреме, кога избраниците на Николај Јакобсен тргнаа во серија од 6:0 за да поведат со 12:5 во 15. минута. Во 23. минута веќе беше 19:9 за Данците, кои на полувреме заминаа со плус 9 (21:12). Предноста на Данците продолжи да расте и во вториот дел, до плус 15 (35:20) во 49. минута.
Данските стрелци ги предводеше Матијас Гидсел со 11 голови. Магнус Ландин постигна седум гола, а Симон Питлик шест. Никлас Ландин имаше десет одбрани.
Најдобар стрелец кај германската репрезентација беше Јури Нор со шест гола, а по четири постигнаа Ренарс Ушинс и Јаник Колбахер.
Така Данска стана првата репрезентација, по Хрватска, која освоила олимписко злато со сите победи на натпреварите кои ги играла на турнирот.
Со две злата и едно сребро Данците ја минаа Хрватска која има две злата и една бронза. Германците останаа на едно злато освоено од репрезентацијата на тогашната Источна Германија во 1980 година во Москва, а ова им е трето сребро.
По петти пат во историјата бронзениот медал го освои репрезентацијата на Шпанија која во утринската програма на последниот ден од овие Игри ја совлада Словенија со 23:22.
