Демократската унија за интеграција, денеска по повод 8 Септември – Денот на независноста, им ја честиташе 30-годишнината од независноста на Република
Северна Македонија на сите граѓани. Еднаквоста и меѓусебното почитување се темел на заедничкиот пат кон нови предизвици и успеси како што е полноправното членство на земјата во Европската унија, порачуваат од ДУИ.
Според нив, земјава се соочила со многу
предизвици во овие три децении, но и постигнала историски успеси и излегла посилна од секое соочување.
Од ДУИ додаваат и дека високо го ценат пријателството со САД и ЕУ, како и земјите-членки, посочувајќи дека, како што се вели во честитката, „успесите на нашата земја се
заеднички со евро-американската заедница“.
Честитка за јубилејот упати и претседателот на ДУИ – Али Ахмети.
„Триесет години подоцна продолжуваме да ја градиме Република Северна Македонија како меѓународно призната земја, со европска перспектива, со многу пријатели со кои соработуваме со цел да обезбедиме одржлива и уште подобра иднина за сите граѓани. Над темелите на референдумот, изјавата на независноста и Охридскиот договор, но и оној од Преспа и добрососедството, ние го избравме дијалогот, еднаквоста и соживотот, но и пријателство со соседите и го одредивме нашиот пат кон НАТО и Европската унија. Денес ние сме полноправна членка на НАТО и со зелено светло за членство во ЕУ. Реформите во согласност со очекувањата на нашите партнери во Брисел и Вашингтон не треба да запрат заедно со напорите за зголемување на квалитетот на животот на нашите граѓани“, порача Ахмети.
