Земјава припаѓа на семејството на ЕУ, одлуката е во наши раце и сега треба да се направи чекорот – се трите конкретни пораки што ги упати денеска државна секретарка задолжена за Европа при Советот на министри на Република Франција – Лоранс Бун, на заедничката прес-конференција на таканаречената Вајмарска тројка, по средбата со вицепремиерот за европски прашања Бојан Маричиќ.
Дискусијата околу Уставот нема да повлекува нови барања од Бугарија, туку земјава автоматски ќе се најде на патеката на пристапување – истакна Бун, иако главните забелешки се дека Бугарија ќе има нови барања на нашиот пат до членство, а не за отворање на преговорите.
„Нема никакви дополнителни барања од ниедна друга земја, но има барања за ревизија на Уставот“, рече Бун.
Според неа, 2030 година е реална цел за македонското членство во ЕУ, а земјава „има сѐ за да напредува кон Унијата и наскоро да се приклучи кон ЕУ“.
„Имам три пораки за вас. Првата е дека Северна Македонија припаѓа на семејството на ЕУ. Втората е дека одлуката сега која што се наоѓа во рацете на Северна Македонија, а третата порака е, како што посочи вицепремиерот, дека сега треба да се направи чекорот на Северна Македонија поради импулсот на сила што го имаме за проширување на ЕУ. Можеби уште една работа што сакам да ја кажам од наша страна е дека оваа дискусија околу Уставот нема да повлекува нови барања од Бугарија, автоматски Северна Македонија ќе се најде на патеката на пристапување потоа. Значи, нема никакви дополнителни барања од ниедна друга земја. Меѓутоа, има барања за ревизија на Уставот… да се заврши тоа, секако, и повторно автоматски Северна Македонија ќе влезе во следната фаза на процесот на пристапување… и исто така во сферата на владеењето на правото, правдата и економската сигурност и реформите кои Северна Македонија треба сама да ги направи за себе“, истакна Бун.
Таа се наврати на деведесетите години и случајот со Полска.
„Во 1990-ите мои претходници сакаа да ѝ помогнат на Полска за пристапување кон ЕУ и гледате колку е успешна Полска. И сметаме дека тоа е исто така можно и за Северна Македонија. Северна Македонија има апсолутно сѐ за да напредува во ЕУ и наскоро да се приклучи кон ЕУ. И за нас и за вас има конкретни придобивки, секако: нови работни места, слободно движење за сите и вклучувајќи ја безбедноста и стабилноста на ЕУ“, рече Бун.
Се осврна и на првата Меѓувладина конференција во Брисел.
„Пред една година се одржа првата Меѓувладина конференција во Брисел каде што со задоволство првпат го запознав премиерот и вицепремиерот. И имаше многу ентузијазам и сакаме да видиме ист таков ентузијазам повторно, така што овде сме да го изразиме тоа и да ја изразиме поддршка за ова. Светот се промени. Геополитичките тензии и она што се случува на нашиот континент го прави проширувањето неопходност за ЕУ, како и поддршката за Украина и Молдавија. Има нова методологија за проширувања која што ќе го направи проширувањето подинамично и се надеваме побрзо. Мислам дека тоа е важно. И за рокот, го кажав на почетокот и уште еднаш ќе повторам, многу јасно дека сакаме да биде што поскоро. Францускиот претседател рече во Братислава: ‘прашањето за проширување не е ако, ниту кога, тоа е веднаш што поскоро, туку како’. Повторно, 2030 година како цел е доста реална и овде сме да ја испратиме пораката на пријателство, пред сѐ пораката на поддршка и пораката на увереност дека веруваме дека Северна Македонија ќе успее. Трите земји, вклучително и Франција, сметаат дека колку е важно за вас, толку е и за европското семејство. И ќе дадеме сѐ од себе да ви помогнеме на патот кон ЕУ“, подвлече државната секретарка за Европа при Советот на министри на Република Франција.
Извор: МИА
