Британската кралска морнарица изврши неуспешно пробно лансирање на балистичката ракета Тридент 2 од нуклеарната подморница ХМС Вангард (HMS Vanguard).
Веднаш по лансирањето, проектилот излегол од патеката и паднал покрај подморницата во која биле министерот за одбрана Грант Шапс и командантот на морнарицата адмирал Бен Ки, пишува Тајмс.
Инцидентот се случил за време на обука во Атлантскиот Океан во близина на брегот на американската сојузна држава Флорида. Првично, се претпоставуваше дека Тридент 2 ќе прелета речиси шест илјади километри и ќе погоди дадена точка во Атлантскиот Океан помеѓу Бразил и Западна Африка.
Британското Министерство за одбрана соопшти дека имало „аномалија при лансирањето“.
– Од причини на националната безбедност, не можеме да обезбедиме дополнителни информации на оваа тема, објасниле претставници на Министерството.
Причината за падот на ракетата од 58 тони опремена со лажни боеви глави бил неуспехот на забрзувачот од прв степен. Сепак, Министерството за одбрана нагласи дека ракетата „Тридент“ се уште е една од најсигурните во светот и успешно поминала повеќе од 190 тестови.
Портпаролот на британското Министерство за одбрана рече дека подморницата и нејзиниот екипаж ги поминале сите тестови и ја докажале својата способност да обезбедат трајно одвраќање за Обединетото Кралство на море.
