Полскиот нуркач Бартломиеј Питала е прогласен за почесен граѓанин на Скопје по подвигот во пештерата Врело на Матка, каде што достигнал длабочина од 338 метри.
Одлуката беше донесена на седница на Градот Скопје. Градоначалникот Орце Ѓорѓиевски ја објави веста и рече дека признанието му се доделува на Питала за неговиот подвиг во Врело.
Во рамките на меѓународната експедиција „Врело 2026“, Питала достигнал длабочина од 338 метри. Според Ѓорѓиевски, со тоа Врело на Матка станала најдлабоката подводна пештера во светот истражена од човек. Во експедицијата учествувале нуркачи од Македонија, Полска и Италија.
Градоначалникот оцени дека успехот може да поттикне повеќе туристи, истражувачи и љубители на природата да го посетат Скопје.
