„Го слушам Зоран Заев со каква леснотија одговара за случајот со фатената дрога и просто не ми се верува. Без грам срам, без грам одговорност, без грам чесност“, пишува портпаролот на ВМРО-ДПМНЕ – Димче Арсовски, по изјавата на премиерот Заев дека независно од тоа кој со кого бил близок, секој што го прекршил законот ќе одговара.
„Вели, Александар колку сакал може да се дружи со Трајче Заев, но ќе одговара. Па да, ќе одговара, затоа што не зависи од тебе, затоа што е фатен во акција на ДЕА и не можеш да му помогнеш. Инаку да зависеше од тебе, најверојатно Александар, другар му на Трајче Заев, сега ќе превезуваше нова пратка. И доста ги лажете луѓето, Александар Ушилковски настрана од тоа дали му бил другар или не на братучед ти, притворениот за дрога му бил личен возач. Тоа го виде цела држава како го вози во Мајбахот“, му реплицира Арсовски на премиерот.
Тој посочува дека е многу чудно, дури и за неверување, тоа што, како што тврди, секој озлогласен криминалец или фатен во некаков криминал, излегува дека е пријател, другар, партиски пријател, се сликаат заедно или е човек што работи за семејството Заеви или за некој висок функционер од СДСМ.
Сепак, според Арсовски, тоа е реалност и луѓето од власта секој ден се дружат со криминалци и работат за себе, а не за државата.
„И треба да одговарате сите до еден од картелот Заеви.
Ако толку сте чесни и транспарентни, а не сте, извадете ги јавно сите удели што ги има било кој поврзан со Заеви во домашни или странски фирми поврзани со канабис, па да видиме во што се вмешани Заеви, а во што не се“, порача Арсовски.
