Откако ги сподели со јавноста иновациите кај Apple Watch, новиот 12.9 инчен таблет и сè што е ново кај Apple TV, на крајот на големиот настан денеска во Graham Civic Auditorium во Сан Франциско, Apple ги покажа и новите модели на iPhone.
Како што се очекуваше, новите паметни телефони на компанијата ги носат имињата iPhone 6S и iPhone 6S Plus.
Новите модели ќе се нудат со ново алуминиумско куќиште во сребрена, златна, космичко-сива и розово-сребрена боја.
Смартфоните на iPhone ќе располагаат со нова функција по име 3D Touch. Што значи тоа? Се работи за препознавање на јачината на допир на екранот. Оваа опција веќе е претставена на паметниот часовник на Apple и на дел од моделите на лап-топ како Force Touch. Така, ако вашите пријатели ви испратат линк во порака, на пример, ќе можете да ја отворите страницата со посилно притискање на линкот.
Новите модели на iPhone користат чип A9. Тој е за 70% побрз во однос на обработката на информациите и за 90% побрз од претходниот чип во однос на графиката.
Новите телефони имаат нов TouchID сензор кој е два пати побрз и располагаат со 12 мегапиксели iSight камера, какви што впрочем беа и очекувањата.
