По подобро изведување на пенали, Хоризонт Турново ја победи Судува и обезбеди пласман во следното квалификациско коло од Лига Европа каде ќе се сретне со Хајдук од Сплит.
Голем ден за Хоризонт Турново, македонскиот дебитант во европските натпреварувања ја продолжува авантурата во Европа.
Вистинска драма се случуваше на Филип Втори по која Турново беше тимот кој што се радуваше.
Кога се чинеше дека нашиот претставник ќе биде елиминиран, во 95. минута беше досуден пенал за Турново и тоа беше клучниот момент во натпреварот.
Дуелот започна очекувано, Судува атакуваше, Турново го чуваше резултатот од првиот натпревар и се обидуваше од контра напади да биде опасен по голот на гостите.
При еден таков напад Блажевски ја погоди пречката од голот на Давидовс.
На две минути пред крајот на првото полувреме, Валскис му донесе водство на литванскиот тим.
Брзо во второто полувреме Турново го изедначи резултатот кога по нафрлување на Блажевски од корнер, Митров реализираше со глава за 1-1.
Радоста траеше кратко, во 52. минута Раџиневичиус го врати водството на Судува, 2-1 за гостите.
Седум минути подоцна, истиот фудбалер беше исклучен поради втор жолт картон, Судува остана со фудбалер помалку.
Хоризонт Турново се обидуваше да дојде до ново изедначување, но тоа тешко одеше, беа пропуштени неколку можности и кога се чинеше дека тука е крајот на европскиот пат, се случи драма.
Во 95. минута Урба играше со рака во сопствениот шеснаесетник, судијата покажа на белата точка за нашиот тим.
Блажевски беше сигурен реализатор, израмнување на 2-2, натпреварот замина во продолженија.
Немаше погодоци во дополнителните 30 минути, па пеналите го решаваа патникот во следното квалификациско коло од Лига Европа.
Хоризонт Турново беше поуспешен во пенал рулетот, не реализираше само Ташев, Литванците не погодија во два наврати.
Радоста на македонскиот тим беше сосема заслужена, голем ден тимот кој доаѓа од малото Турново, Хоризонт закажа пресметка со Хајдук од Сплит.
Текстот е објавен во соработка со 24Фудбал
