![Germanija Ungarija](https://365.mk/wp-content/uploads/2024/09/Germanija-Ungarija.webp)
Со многу добри настапи фудбалерите на Германија и Холандија ги постигнаа првите победи во новата сезона од Лигата на нации на УЕФА. Германија ја победи Унгарија во Дизелдорф со 5:0 во групата 3 од Лигата А, додека во истата група Холандија ја победи Босна и Херцеговина со 5:2 на домашен терен во Ајндховен.
Германците беа подобри од Унгарија неодамна на Европското првенство во групата, а славеа и оваа сабота откако Никлас Фуелкруг ги начна гостите во 27. минута. Во продолжение Унгарците беа скршени од Мусиала и Вирц кои комбинираа заедно во 57. и 66. минута, а најпрвин стрелец беше Мусиала, а асистент Вирц, а потоа ги сменија улогите на 3:0. До крајот на натпреварот за разиграните Германци погодија Павловиќ во 77. минута и Хаверц во 81. минута од пенал.
Во истата група Холандија пред своите гледачи ја победи Босна и Херцеговина со 5:2. Иако Холанѓаните до крајот беа видно подобри, сѐ до крајот беше загрозено освојувањето на трите бода.
Холанѓаните поведоа во 13. минута со голот на Циркзе, но Демировиќ израмни во 27. минута. Кога Рајндерс и Гакпо погодија во судиското надополнување на првото полувреме и во 56. минута за 3:1, се чинеше дека гостите се дефинитивно скрешни. Но Џеко во 73. минута намали на 2:3, а потоа и БиХ тргна по израмнување. Гостите создадоа неколку одлични можности, но не стигнаа до 3:3. Потоа следеше пенал на другата страна, а на крајот Вегерст и Симонс погодија за конечни 5:2.
Претходно во саботата фудбалерите на Англија, актуелните европски вицешампиони забележаа победа во Лигата Б, славејќи против Ирска во Даблин со 2:0. Тоа беше првиот англиски натпревар без Герет Саутгејт на клупата, а привремена работа доби Ирецот Ли Карсли, поранешниот селектор на Англија до 21 година.
Англија поведе во 11. минута кога Деклан Рајс од десетина метри прецизно и силно погоди под пречката. Рајс не го прослави голот бидејќи на почетокот од кариерата настапуваше за сите помлади репрезентативни возрасти на Ирска, а пред да заигра за Англија забележа три настапа и за сениорската селекција на Ирска. Само неколку минути подоцна капитенот Хари Кејн можеше да круниса добар англиски контранапад со гол за 2:0, но одлично реагираше домашниот голман Келехер, кој беше еден од најдобрите поединци на овој меч. Во 26. минута Англичаните ја зголемија предноста, а повторно за Ирците беше кобен фудбалер кој како млад играше во помладите возрасни групи на нивната репрезентација. Тоа беше Џек Грилиш, кој со гол ја заврши прецизната и брза акција на својот тим. На почетокот на вториот дел, Ирска стисна и се обиде да се врати во игра. Таа не успеа во тоа, а најопасен ирски играч беше Шмодикс. Потоа играта се смири, а Англија рутински ја задржа предноста и ја забележа првата победа во Лигата Б.
Во групата во која се Англија и Ирска стартните три бода го освои Грција која во Пиреја ја совлада Финска со 3:0. Играч на натпреварот беше Јоанидис, кој беше двоен стрелец, а во продолжение Калман си постигна автогол.
Во групата 1 од Лигата Б, Грузија на домашен терен со убедливи 4:1 ја совлада Чешка. Грузијците поведоа во 33. минута кога Кварацкелија погоди од пенал. Натпреварот беше решен во само четиринаесет минути од вториот дел. Од 53. до 66. минута Грузијците постигнаа три гола, а стрелци беа Чакветадзе, Микаутадзе и Кочорашвили. До крајот на натпреварот Чешка успеа да постигне почесен гол, а стрелец беше Калвач во 81. минута.
Во оваа група Албанија ја победи Украина со 2:1 во Прага во меч на кој сите голови беа постигнати во вториот дел. Конопља ги доведе Украинците во водство во 49. минута, а потоа следеше пресврт. Го направија стрелците Исмаџили во 54 и Асани во 66 минута.