Холандските фудбалери станаа седмата селекција која избори пласман во четвртфиналето на Европското првенство во Германија, откако во вторникот во осминафиналето одиграно во Минхен ја совладаа романската репрезентација со 3:0 (1:0). Водечкиот гол за Холанѓаните го постигна Коди Гакпо во 20. минута. Истиот играч асистираше за голот на Дониел Мален во 83. минута, а овој холандски напаѓач во третата минута од судиското продолжение ги постави конечните 3:0.
Холанѓаните влегоа во овој меч како очигледни фаворити, иако натпреварувањето го завршија на третото место во групата, а Романците се пласираа во осминафиналето како првопласирани во својата група. Билансот во меѓусебните натпревари беше наголемо на страната на Холандија, бидејќи Романија успеа да победи само еднаш во 13 натпревари.
Сепак, без разлика на историјата на нивните дуели и мислењето на повеќето стручњаци, Романците на почетокот од дуелот во Минхен наметнаа прилично висок и силен притисок врз холандската одбрана. Така, веќе во 2. минута Јанис Хаџи беше во добра ситуација, но Дензел Дамфрис спречи топката да стигне до романскиот играч за врска, при што ненамерно го повреди противникот. Хаџи се врати во игра со завој на главата и во 8. минута во стилот на многу попознатиот татко нанижа неколку холандски играчи, но не доби шанса да шутира.
Најдобрата ситуација пред холандскиот гол ја создадоа избраниците на Едвард Јорданеску во 14. минута. По соло пробив, Денис Ман реши да шутира од работ на шеснаесетникот, топката профуче над пречката.
Освен една ситуација кога Мемфис Депај изби пред романскиот голман Флорин Нита, но претходно беше во офсајд, Холанѓаните не се видоа многу во првите 15 минути од натпреварот. А потоа дојде 20. минута во која Холандија го постигна водечкиот гол. Холанѓаните долго време комбинираа, се обидуваа да ја префрлат топката од фазата на одбрана во средината, што не беше лесно да се направи низ густо поставената романска зона. Сепак, Чави Симонс ја прими топката на околу 40 метри од голот, сврте и веднаш тргна на левата страна кон Коди Гакпо.
Романците го оставија сам Андреј Ратиу против крилниот напаѓач на Ливерпул, што брзоногиот Гакпо го искористи. Со една промена на правецот го скрши романскиот дефанзивец, ослободи доволно простор за удар со десната нога и од 15-16 метри дијагонално од левата страна упати кон просторот крај стативата. Флорин Нита остави доволно простор што не успеа да го запре прецизниот и моќен удар на најдобриот холандски стрелец на ова Евро, кој со тоа стигна до својот трет гол на турнирот.
Голот ги тргна Холанѓаните, кои до крајот на полувремето се најдоа во неколку можни ситуации да го зголемат водството. Во 26. минута Депај погоди од корнер, а на втората статива од непосредна близина Стефан де Вриј со глава биеше во надворешната страна на мрежата. Во 31. минута, Раду Драгушин со лизгачки старт во последен момент и му го отсече додавањето на Дамфрис до Депај, кој само што требаше да ја турне топката во небранетата мрежа. Во 44. минута ниту Чави Симонс не успеа да постигне гол. Прими одлична повратна топка, но наместо шут реши да ја смиро топката, што не му успеа, а кога се обиде да шутира, во неговиот блок веќе имаше романски дефанзивци.
На полувремето Роналд Куман го остави Стивен Бергвијн во соблекувалната и го внесе Дониел Мален, со што стави до знаење дека неговиот тим ќе тргне на вториот гол за да обезбеди пласман во четвртфиналето. Мален беше во акција, што можеше да им донесе удвојување на воството на Холанѓаните во 54. минута. Неговиот удар беше изблокиран од Драгушин, но топката се одби до Депај. Сепак, во изгледнта ситуација, најдобриот холандски шутер во оваа генерација не шутираше добро, па пропадна оваа шанса.
Холанѓаните промашуваа и немаа среќа. Така, во 58. минута Вирџил ван Дијк со глава од десет метри ја погоди стативата. Во 62. минута нов обид на Коди Гакпо беше сопрен од романскиот голман Нита, а една минута подоцна Гакпо ја упати топката во мрежата, но ВАР-от откри дека бил во минимален офајд при додавањето.
Во 68. минута Депај се закани од слободен удар, но топката мина право покрај стативата и заврши во гол-аут. Во 73. минута се беше подготвено за реализација на Мики ван де Вен, но овој повторно ја испрати топката на погрешната страна од стативата. Во 80. минута беше изблокиран изгледен удар на Гакпо од шеснаесетникот.
Конечната разврска на натпреварот се случи во 83. минута. Депај одлично се снајде по левото крило и ја додаде топката преку глава до Гакпо. Тој набрзина кон гол-линијата покрај Драгушин. Романскиот дефанзивец мислеше дека топката е пребрза и дека Гакпо ќе излезе надвор од рамките, но Холанѓанецот одлично се снајде, ја турна топката од линијата кон Дониел Мален, кој од неколку метри ја турна во мрежата.
Во самиот финиш на дуелот Мален во соло-акција мина двајца романски дефанзивци и ладнокрвно го совлада Нита од 11 метри за конечните 3:0.
Во четвртфиналето Холандија го чека победникот од последниот осминафинален натпревар во кој во Лајпциг се среќаваат Австрија и Турција (21 ч.).
