Генералниот секретар на НАТО, Јенс Столтенберг, изјави дека верува оти Русија „засекогаш ја загуби Украина“ како резултат на војната и дека нема да може да ги постигне своите воени цели и покрај огромните воени напори по инвазијата во февруари минатата година.
„Целта на оваа инвазија беше да се спречи Украина да се движи кон НАТО и Европската унија. Украина сега е поблиску до НАТО и Европската унија од кога било досега. Ова е голем стратешки пораз за Русија. Претседателот Путин засекогаш ја загуби Украина“, рече Столтенберг во интервју за ДПА, мислејќи на фактот дека Русија со децении ја гледаше Украина како дел од својата сфера на влијание.
Поранешниот норвешки премиер е сигурен дека Украина на крајот ќе ја постигне целта за влез во НАТО. Тој, исто така, истакна дека Русија плаќа енормно висока цена за својата војна.
„Русија изгуби стотици авиони, илјадници борбени тенкови и 300.000 жртви. Нивната економија е послаба. Тие се политички поизолирани. Инфлацијата е зголемена, животниот стандард е намален“, рече Столтенберг.
Сепак, тојг предупреди да не се смета на брз крај на војната, велејќи дека нема индиции дека Путин ќе го промени курсот, дури и по неговиот очекуван реизбор на 17 март.
