Во услови кога нема прекин на огнот во Газа, земјите членки на ЕУ мора да усогласат некаков начин за да ја направат хуманитарната ситуација на теренот помалку страшна, додека во меѓувреме бомбардирањето продолжува со голем интензитет предизвикувајќи голем број невини човечки жртви, изјави високиот претставник на Унијата за надворешна политика и безбедност Жозеп Борел пред денешното заседание во Брисел на министерски Совет за надворешни работи на блокот.
– Илјадници луѓе се притиснати кон границата со Египет, што ги прави перспективите во Газа навистина црни. Министрите ќе разговараат за нашата позиција за тоа што треба да преземеме во врска со Газа кога ќе завршат нападите, како и што да се прави со луѓето во Газа за кои велиме дека не смеат да бидат протерани од нивната земја, но тоа е тешко кога тие бегаат од бомбардирањето и бараат заштита, додаде Борел.
Тој потсети и дека земјите на ЕУ членки на Советот за безбедност на ОН гласаа за предложената резолуција, на кој САД ставија вето, и која сега ќе биде упатена на усвојување во Генералното собрание на Светската организација.
Борел истакна дека на состанокот ќе стане збор и за документот за посветеноста на безбедност на Украина, што ќе биде презентиран пред Советот на ЕУ за време на заседанието в четврток и петок, во услови, како што рече, на зајакнати руски бомбардирања и кога Киев пред неколку дена претрпе значителни штети во еден од најголемите напади со дронови од почетокот на војната.
– Сега е време да ги посветиме сите наши капацитети за поддршка на Украина. Советот на ЕУ ќе расправа за тоа, а министрите за надворешни работи ќе треба да ми дадат насоки што ќе ги презентирам пред Советот за безбедносната посветеност, првенствено во однос на зајакнување на капацитетот на европскиот мировен механизам, за билатералните договори меѓу земјите членки и Украина и што ќе преземеме на ниво на Европската Унија, додаде Борел.
Тој изрази надеж дека нема да биде засегнато европското единство во однос на Украина и најави дека министрите за надворешни работи ќе разговараат за предлозите за зголемување на помошта за земјата.
Нагласувајќи дека досега членките на ЕУ ангажираа многу ресурси и обезбедија воена поддршка за Украина од околу 26 милијарди евра, Борел потенцираше дека е многу важно помошта што се дава за земјата на билатерална основа да се координира и да биде обезбедувана на ниво на ЕУ.
– Потребен ни е механизам што ќе ги поврзе земјите членки и со кој ќе ги надминеме детектираните проблеми, додаде Борел.
Тој потенцира дека на Советот ќе се разговара и за случувањата и зголемената терористичка закана во регионот на Сахел и Гвинејскиот Залив, како и за многу значајната надворешно-политичка димензија на економската безбедност на ЕУ.
Борел потенцира дека шефовите на дипломатијата ќе се сретнат и со ерменскиот министер за надворешни работи Арарат Мирзојан, додавајќи дека од нивната последна средба „се случија многу работи“ во Јужниот Кавказ и затоа е потребно ЕУ да обрне посебно внимание на регионот и особено на Ерменија.
Тој информира дека синоќа во пресрет на Совет, министрите за надворешни работи на земјите членки на ЕУ имале неформална вечера со лидерката на белоруската опозиција Свјатлана Циханускаја, на која разговарале за политичката состојба во Белорусија, особено во пресрет на најавените избори во земјата.
МИА
