Израелскиот премиер Бенјамин Нетанјаху денеска на социјалните мрежи ги критикуваше шефовите на разузнавањето во земјата, велејќи дека тие не го предупредиле дека Хамас планира напад на 7 октомври, но подоцна ги повлече своите коментари и се извини.
Неговите критики, објавени на „X“ околу 1 часот по полноќ по локално време, предизвикаа политички скандал и раздор во воениот кабинет на Нетанјаху, што предизвика гнев во јавноста поради тоа што не ја презема одговорноста за разузнавачките и оперативните грешки поврзани со нападот на „Хамас“ во јужниот дел на земјата.
Портпаролот на израелската војска, запрашан за коментарите на Нетанјаху за време на дневниот брифинг, одби да одговори, велејќи: „во моментов сме во војна и фокусирани сме на војната“.
Во сега избришаната објава на Нетанјаху се вели: „Премиерот Нетанјаху во ниту еден момент и во ниту една фаза не беше предупреден за воените намери на Хамас“. Во вториот X пост околу 10 часа подоцна, Нетанјаху напиша: „Згрешив“, додавајќи дека неговите забелешки „не требало да бидат дадени и се извинува за тоа“.
„Им давам целосна поддршка на сите шефови на безбедносните единици“, рече тој.
Првичните коментари на Нетанјаху веднаш беа критикувани од сегашните и поранешните сојузници, вклучувајќи го и Бени Ганц, поранешен министер за одбрана, кој сега е во воениот кабинет на Нетанјаху. Ганц рече дека Нетанјаху треба да го повлече она што го кажа и да остави работата да згасне.
МИА
