![](https://365.mk/wp-content/uploads/2023/07/napad-na-krimski-most.jpg)
Портпаролот на украинската воена разузнавачка служба (ГУР) – Андриј Јусов, изјави дека службата нема да го коментира инцидентот што се случи утрово на мостот кон Крим во кој загинаа две лица, а едно дете е повредено.
„Сега целиот свет може да ги види километарските сообраќајни колони и оштетување на конструкцијата на мостот. Што се однесува до дополнителни коментари во врска со инцидентот, нема да има. Можам само да ги цитирам зборовите на првиот човек на ГУР, Кирил Буданов, дека Кримскиот мост таму e вишок објект“, изјави Јусов.
Тој истакна дека поради оштетување на дел од мостот, Русите ќе имаат проблеми со логистика.
„Русите го користат Крим како главен логистички центар за движење на силите и опремата длабоко на територијата на Украина“, истакна Јусов.
Портпаролот на украинската доброволна армија „Југ“, Сергиј Брачук, изјави дека причина за инцидентот би можел да биде дрон „Шахид“, кој, како што наведе, го лансирале Русите.
„Јас би ја разгледал оваа верзија, бидејќи столбот се урна токму во правец на Кубањ. Да не го заборавиме градот Приморско-Ахтарск во Краснодарската територија, од каде што се лансираат озлогласените ирански ‘шахиди’, кои летаат кон Украина и уништуваат цивилни објекти. Можно е еден таков ‘шахид’ да се ‘уморил’ и да паднал на столбовите на Кримскиот мост. Таквата верзија има основа“, рече тој.
Портпаролката на јужната команда на украинската армија – Наталија Гумењук, оцени дека експлозиите на мостот на Крим би можеле да бидат провокација на руските сили, со цел да се наруши „договорот за житото“.
Украинските безбедносни служби, во меѓувреме, издадоа официјално соопштение во врска со нападот на мостот. Во него, како и во многу претходни случаи и напади на руска територија, тие не признаваат отворено дека „нивната безбедносна агенција СБУ стои зад инцидентот“, но ја навестуваат улогата на официјален Киев во нападот на мостот Керч, што ги поврзува полуостровот Крим со руската Краснодарска област.
„Сите детали во врска со експлозијата ќе бидат објавени по победата“, соопшти агенцијата, пренесе Би-би-си.
Извор: МИА