Унгарија одбива да ја деблокира новата транша од 500 милиони евра од Европскиот мировен фонд за компензација за оружјето испорачано на Украина од земјите-членки на Европската унија (ЕУ), соопштија неколку делегации во Брисел.
Унгарската влада потврди дека не ја одобрила исплатата на оваа нова помош бидејќи „не се согласува со ЕУ, која има други инструменти, да го користи Европскиот фонд за мир исклучиво за Украина“.
„Нема да има доволно пари за промовирање на интересите на ЕУ во други региони (на пример, Балканот, регионот Сахел и Северна Африка)“, соопшти унгарската влада.
Овој став Будимпешта го бранеше на состаноците вчера и денеска како дел од подготовката на состанокот на министрите за надворешни работи на ЕУ на 22 мај во Брисел, соопштија денеска повеќе делегации.
Унгарија не ги блокира пратките со оружје и муниција што ги побара Киев за одбрана од Русија, но спречува паричен надоместок за земјите-членки, додаваат делегациите.
Искористувањето на средствата од Европскиот фонд за мир бара едногласно одобрување од сите земји-членки. Во тој фонд има 5.7 милијарди евра за периодот 2021-2027. Овој фонд во мај беше зголемен за уште две милијарди евра.
Механизмот се користи за враќање на 40 отсто од вредноста на оружјето доставено во Украина и за обука на украинските војници на земјите-членки. Тој е надополнет со придонеси од земјите-членки, а 66 отсто од неговото финансирање го обезбедуваат Германија, Франција, Италија и Шпанија.
Од почетокот на руската инвазија врз Украина во февруари 2022 година, земјите-членки ослободија 3.6 од 5.7 милијарди евра од тој фонд за воена поддршка во Киев.
Извор: МИА
