Германскиот претседател Франк – Валтер Штајнмајер оцени дека рускиот напад на Украина доведе до историски прекин на односите меѓу Берлин и Москва.
„Кога ќе ја погледнеме Русија денес, нема место за старите сништа“, смета тој, наведувајќи дека Германија и Русија „денес стојат една против друга“.
„Руската агресија и нас во Германија нè доведе во друго време, во време на несигурност за што мислевме дека е минато, време обележано со војна, насилство, бегалци, грижи од ширење на војната во Европа“, изјави тој.
Според него, тоа е сега свет што не е идеален и потребни се инструменти за спротивставување на таквиот свет.
„Санкциите со себе носат и последици, но, што е алтернатива за нив – да гледаме како ништо да не се случило? Во наш интерес е со партнерите да се спротивставиме на свртувањето на Русија надесно, да се спротивставиме на режим што го напаѓа соседот и ја користи енергијата како оружје“, оцени тој.
Штајнмајер изјави дека Германија не е во војна и дека тоа е важно, како и дека е важно да се избегне нуклеарна ескалација.
„На никој кој е свесен не му недостасува желбата за преговори за мир, но ситуацијата е таква што не е доволно само добрата волја. Мир што би го наградил одземањето земја на Путин не е мир, би значело препуштање на Украинците на угнетување и би ја зголемил гладта на Путин за понатаму, а тука се Грузија, Балтикот, Молдавија. Брз неправеден мир не е вистински мир, туку само би ги зајакнал оние во светот кои знаат само за сила, а не за право“, нагласи Штајнмајер.
Моменталната ситуација, подвлече, е голем тест за сите.
„Можеби поради тоа нема да можеме да го продолжиме нашиот успешен економски пат, но, можеме да го постигнеме она што е значајно, а тоа е да ги сочуваме нашите вредности. Новото време е предизвик за сите нас. Тоа време бара промена и залагање на сите во Германија. Мораме наредните години да ги прифатиме ограничувањата, сите мораат да дадат свој придонес во оваа криза“, порача Штајнмајер.
Тој потенцираше, меѓутоа, дека кризата ги погодува најпрво луѓето кои и пред оваа војна водеа битка за преживување.
„Но, мора да ја избегнеме поделбата на светот на ‘ние против нив’, бидејќи тоа не е во наш интерес. Мораме истовремено да ја намалиме ранливоста и зависноста, но, тоа не значи намалување на вмрежувањето со светот, туку поголемо вмрежување. Но, не треба да се поврземе со мал број, туку со поголем“, додаде германскиот претседател.
Путин, според него, се обидува да ја подели Европа и го „внесува отровот на поделбата“ и во германското општество, кое е ранливо поради неговата отвореност која што сака и да ја сочува.
Во критичната инфраструктура на Германија, како што тврди тој, спаѓа и демократијата, што може да се заштити само со ангажирање и пружење отпор на секој граѓанин.
Тој исто така ги повика граѓаните во Германија на единство во моменталната ситуација.
Извор: МИА
