Најмалку шест лица загинаа, а неколку се повредени во последните руски ракетни напади во градовите низ Украина, вклучително и главниот град Киев, пренесе ДПА.
Три тела се извлечени во Киев, објави на Телеграм заменик-шефот на претседателскиот кабинет Кирило Тимошенко, додавајќи дека 19 лица се спасени од урнатините на куќа уништена од експлозија.
„Спасувачките напори продолжуваат“, рече Тимошенко попладнево.
WATCH: #BNNUkraine Reports.
Ukraine officers opened fire on drones flying low over Kyiv skies on Monday, claiming they were “kamikaze drones,” with smoke rising from the locations where the drones were struck. #Russia #Ukraine #War pic.twitter.com/3CVqUnOkeO
— Gurbaksh Singh Chahal (@gchahal) October 17, 2022
Градоначалникот на Киев, Виталиј Кличко, идентификуваше две од жртвите како млад пар. Жената била во шестиот месец од бременоста, рече тој.
Според гувернерот Дмитро Живицки, во регионот на Суми загинале најмалку три лица, а девет се повредени откако утрово три руски проектили погодија цивилна цел.
„Сè уште има луѓе затрупани под урнатините“, додаде тој.
Според украинскиот министер за внатрешни работи Денис Монастирски, во Киев биле повредени и двајца болничари.
„Русија денеска нападна со вкупно 40 дронови, од кои пет го погодија Киев“, рече тој. Според украинското претседателство, над 20 од дроновите го таргетирале главниот град.
📹The Kyiv Patrol Police showed how one of the kamikaze drones was shot down in Kyiv today. pic.twitter.com/sHlKmnx2qK
— Ukraine NOW (@UkraineNowMedia) October 17, 2022
Напади беа пријавени и во регионите на Дњепропетровск и Одеса.
Москва соопшти дека ја гаѓала енергетската инфраструктура на земјата.
„Стотици населени места сè уште се без струја“, изјави украинскиот премиер Денис Шмихал.
Руската армија, пак, неколку часа по нападите, соопшти дека ги погодила „сите таргетирани“ нејзини цели во Украина.
„Руските вооружени сили продолжија со напади со висока прецизност и со долг дострел… оружје во воените командни и контролни објекти и енергетските системи на Украина“, објави руското Министерство за одбрана.
Како што соопшти рано утрово градоначалникот на Киев, Виталиј Кличко, во главниот град бил нападнат централниот Шевченковски реон, вторпат во рок од една недела. Во овој реон има многу универзитети, студентски кафулиња и ресторани. Областа беше погодена и минатиот понеделник од неколку експлозии, кога Русија ја нареди својата досега најголема воздушна офанзива против украинските градови како одговор на експлозијата на мостот што ја поврзува Русија со полуостровот Крим.
Претседателот на Украина, Володимир Зеленски, сепак, денеска повторно порача дека нападите нема да ги „скршат“ Украинците.
„Цела ноќ и цело утро, непријателот го тероризира цивилното население. Беспилотни летала и ракети камикази ја напаѓаат цела Украина. Непријателот може да ги нападне нашите градови, но нема да може да нѐ скрши“, категоричен беше Зеленски.
Извор: МИА
