„Вчера се чуствував горд граѓанин во оваа наша земја, затоа што после 20 години, со апелот на сите политички субјекти, на сите општественици, со професионалниот кадар на статистика под раководство на директорот Апостол и заменик директорот, пред сѐ нашите граѓани, во педесетина региони исклучително успешно стартуваше пописот во нашата земја. Последниот податок покажува дека некаде 94.500 граѓани се попишале, што е исклучително успешно имајќи предвид дека е недела и дека е прв ден за попис. Сакам да им честитам на сите попишувачи, но најмногу на сите граѓани“, изјави денеска премиерот Зоран Заев.
Тој посочи дека спроведувањето на пописот е возможно дури и за време на пандемија затоа што физичките дистанци се одржуваат доколку тоа е потребно.
„И навистина првиот ден е исклучително охрабрување за успешен попис. Секако имаме уште 24 дена до 30 септември, но сакам да се заблагодарам на сите кои успешно стартуваа, пред сѐ на министерот за правда, на Заводот за статистика, но и на граѓаните и на попишувачите. Верувам дека податоците ќе бидат сериозен индикатор за уште поуспешни севкупни политики на развој на нашата земја“, рече Заев на настанот по повод промоцијата на поштенска марка повод 30-годишнината од независноста на земјата.
