Претседателот Пендаровски денеска го прими Дејан Георгиевски – олимпискиот вицешампион во таеквондо на ЛОИ во Токио.
Претседателот Пендаровски, честитајќи му го извонредното постигнување и освоениот медал, истакна дека неговиот успех донесе огромна слава и радост за цела држава и претставуваше чин којшто ги сплоти сите граѓани.
„Ви благодарам во името на сите граѓани што нѐ направивте горди и што потврдивте дека со голем напор и залагање, професионалност и посветеност нема недостижни цели. Дадовте пример за сите македонски спортисти дека можат да се освојуваат светските спортски тронови, пример кој се надевам ќе го следат младите“, рекол Пендаровски на средбата, пренесуваат од неговиот Кабинет.
Тој воедно изрази надеж дека ова е само почеток на големите успеси, како на Дејан Георгиевски, така и на овој спорт во нашата држава и даде уверување дека секогаш македонските спортисти ќе ја имаат неговата поддршка.
Како што може да се види од видеото што претседателот на државата го сподели на Фејсбук, на средбата Георгиевски на Пендаровски му демонстрирал и дел од својот репертоар.
Дејан Георгиевски го освои сребрениот медал во таеквондо на Олимписките игри во Токио, што претставува историски најголем успех на македонски спортист постигнат на Олимписки игри од независноста на нашата држава.
