Антикорупциската комисија работи врз предмет за државната помош за плати која беше дел од првиот сет мерки за ублажување на економските последици од корона-кризата, а која, меѓу другите фирми, ја добила и фирмата Вебспот ДОО, каде меѓу ко-сопствениците фигурира и досегашната министерка за финансии – Нина Ангеловска, велат од ДКСК за „Радио Слободна Европа“.
Ангеловска беше обвинета од ВМРО-ДПМНЕ дека „повторно“ ја злоупотребила позицијата и самата на свои фирми си доделила помош.
На тоа реагираа од СДСМ, кои ја обвинија опозицијата за манипулација:
„Помошта за која денеска манипулира ВМРО-ДПМНЕ е дел од антикризните мерки, не е селективна мерка каде се одлучува дали некој ќе ја добие или не. Критериумите за државната помош се јасни: Секоја фирма која имала пад од 30% од добивката добива државна помош под услов парите да ги префрли на работниците и истите да не бидат отпуштени. Ако компанијата оствари добивка, ќе ги врати парите кои ги добила како државна помош и ова се критериуми кои важат за сите правни лица кои добиле државна помош“.
И според антикорупционерите, клучно е по кои критериуми била доделена помошта од вкупно 11 илјади евра за Вебспот ДОО, односно дали компанијата реално имала потреба и ги исполнувала критериумите, или ги добила поради други неосновани причини. Од компанијата, тврдат дека е првото.
Според податоците од Централниот регистар, Ангеловска во Вебспот ДОО фигурира како еден од тројцата сопственици и основачи на платформата за онлајн трговија – Групер.мк, со учество во основачкиот влог од 2600 евра. Како управител на компанијата во документот од Централниот регистар е заведен еден од нејзините партнери Мартин Китановски. Повеќе ТУКА.
