Новиот премиер Зоран Заев ги демантира информациите дека одлуките како премиер ќе ги носел со согласност на „првиот вицепремиер“ Артан Груби со врзан потпис и дека ќе се оди кон законски измени за да се овозможи тоа.
Според Заев, „прв вицепремиер“ значи дека ќе го менува премиерот кога е отсутен за водење седница, прием на делегација и сл. …
„Се знае дека премиерот потпишува, нема никакви врзани потписи. Секако во идната влада планирам да имам четири вицепремиери, од кои тројца на предлог на СДСМ и еден од ДУИ, кој ќе биде именуван за прв вицепремиер“, рече Заев.
Како што истакна тој, назначувањето на Артан Груби, односно кадар од ДУИ, за прв заменик на премиерот, е заради подобра координација меѓу двете политички партии, како што рече, во делот на преземањето на одговорноста, со цел ефикасно донесување одлуки. Именувањето на Груби, кој ќе раководи и со Министерството за политички систем, има за цел и „да се даде важност“, додаде Заев.
