Најголемиот дел од заразените туристи во Грција се од Србија, објавија грчките медиуми, пренесува „B92“. Уште повеќе, тие претставуваат половина од новите случаи на Ковид-19 во земјата.
Во Грција во последните 24 часа се регистрирани 43 нови случаи на коронавирус, а не е регистриран ниту еден смртен случај. Од новозаразените, 36 се туристи од граничните премини, откриени на граничниот премин Промахонас со Бугарија. Од овие, 20 се државјани на Србија, а 16 од другите земји.
Грција ги затвори границите за влез на српските државјани и така ќе остане најрано до 15 јули, кога повторно ќе биде разгледана одлуката.
По најавата на одлуката дека Грција воведува забрана за влез од следното утро од 6 часот, голем број Срби побрзаа кон Грција за да го фатат „последниот воз“, но останаа со часови заробени на границата грчко-бугарската граница.
