Полагање матура во Кина

Полагање матура и полагање матура во Кина ич не е исто. Во Кина ја викаат gaokao, а учениците поминуваат скоро половина од своите животи учејќи за тестот. Воведен е во 1952 година, како мерка за да се спречи јазот во можностите на сиромашните и богатите студенти во Кина.

Полагањето на матурата трае два дена – по 9 часа дневно, и покрива низа предмети, меѓу кои и кинеска литература и математика. Резултатите од тестот одредуваат кој од студентите ќе може да продолжи на факултет – тие што ќе поминат лошо на тестот ги губат шансите за диплома од некој од кинеските универзитети, а со тоа се соочуваат и со лоши перспективи за вработување. Секоја година, околу 9 милиони студенти конкурираат за помалку од 7 милиони студентски места.

Притисокот од полагањето е огромен. Очајните ученици прават сé што може да им помогне околу тестот. Тоа вклучува и земање на IV амино киселини кои ја подобруваат енергијата за учење, а и подложување на хипербарични кислородни комори – за намалување на стресот.

И покрај тоа, притисокот некогаш е едноставно преголем: Во 2011-тата, на првиот ден од испитите, ученикот Лу Пин скокна од шестиот кат на својот интернат.

Освен секаквите психички и психо-физички промени кај учениците, на деновите на полагањето комплетно се менуваат и градовите. Авионите ги менуваат рутите, фабриките се затворени, а свирењето со автомобили е забрането. За време на Летните олимписки игри од 2008, беше променета и рутата на носење на олимпискиот факел, сé со цел да не се вознемируваат учениците што го полагаа тестот.

Здравиот разум би сметал дека вака ригорозна ситуација би била оправдана и со добри резултати. Но, прашање е дали е така. Пред сé, тестот е критикуван затоа што форсира меморизација т.е. учење на памет, а не учење со разбирање.

Веќе рековме, тестот има страшен импакт врз емотивната и здравствената состојба на учениците што го полагаат, а е и дискриминаторски, затоа што е базиран врз регионален квота систем. Како резултат, многумина повикуваат на крај на гаокао.

Еден кинески водител на ток шоу во една прилика праша: „Зарем нема начин да избегнеме нашите помлади генерации, иднината на нашата нација, да растат во така застрашувачка, очајна и сурова атмосфера?“.

Во крајна сметка, и самите бројки водат кон укинувањето на гаокао. Сé помалку ученици се решаваат да го полагаат тестот – во Пекинг, Лиаонинг и Џиангсу до рекордно ниско ниво, а неодамна месецов и самите експерти од полето на образованието побараа од универзитетите да почнат да бараат други методи на регрутирање, за да го задржат бројот на ученици што се запишуваат на факултет.