Се бара: Фиктивен новинар од бајките

Според критериумите на жените, совршениот маж не постои. Според критериумите на мажите, совршената жена не постои. Според критерумите на Денвер Пост, не постои совршениот новинар.

Во понеделникот, The Cannabist – револуционерен специјализиран вебсајт за марихуана и сé околу марихуаната, објави оглас за новинар кој ќе пишува стории и статии за тековната борба за легализација во другите земји во САД и Канада (во Колорадо, од каде што потекнува весникот Денвер Пост, е легализирана уште од 2014), за бизнисот на одгледување и продавање на марихуана, рецепти базирани на марихуана, како и ривјуа и критики за продукти и „опрема“ за пушење марихуана. Работниот опис вклучува и искуство со „self-created visuals“ (по нашки – работа со слики и графикони, по треварски – трипови и халуцинации).

Има само еден огромен проблем: сите заинтересирани кандидати ќе мораат да го поминат тестот за дрога (значи: да не користат дрога), како што е редот и со сите други кандидати за било која позиција во Денвер Пост.

Од друга страна па, првиот аргумент на секој што пафка е: „па марихуаната не е дрога“, така да, очекуваме дека огласот ќе има добар одѕив.