Огромен зелен покрив

Експерти од компанијата “Sand hill property” развија проект за нов шопинг центар во Силиконската долина на чиј што покрив ќе се најде огромна зелена површина.

Компанијата купила 20 хектари земјиште, а целиот проект ќе чини околу три милијарди долари.

Зелената површина нема да се наоѓа само врз шопинг центарот, туку и врз околните згради и седишта на лидерски светки компании. Планот е покривите да изгледаат како да е земјата издигната за неколку ката.

Оваа зелена површина би била отворена за посетителите, а во нејзини рамки ќе се наоѓаат градини, овоштарници, амфитеатар и паркови за деца. Исто во план е да биде изградена километарска стаза за џогинг и прошетки.

Во моменталниот предлог се наведува дека ќе биде изградено и кино, терен за куглање и лизгање. За сега се уште се чека дозвола за изградба на ваква површина, бидејќи освен конструкцијата потребна е и рециклирана вода за наводнување, греење и ладење, како и систем за собирање на дождовницата.

Површината би била пошумена со едноставно зеленило кое не е тешко за одржување. Освен тоа, компанијата планира да донира 40 милиони долари за две локални училишта.